సోలో హీరోగా ఓ కొత్త సినిమా
10-Jun-2017 11:48:27
హీరోగా నిలదొక్కుకోవడానికి అష్టకష్టాలు పడుతున్నాడు సాయికుమార్ తనయుడు ఆది. ప్రేమకావాలి.. లవ్లీ లాంటి యావరేజ్ సినిమాలతో అతడి కెరీర్ ఓ మోస్తరుగానే ఆరంభమైంది కానీ.. ఆ తర్వాత వరుస ఫ్లాపులతో సతమతమయ్యాడు. అందులోనూ ఈ మధ్య గరం.. చుట్టాలబ్బాయి లాంటి ఫ్లాపులతో కుర్రాడు బాగా వెనుకబడిపోయాడు. ఎన్నో ఆశలు పెట్టుకున్న చుట్టాలబ్బాయి నిరాశ పరచడంతో సోలో హీరోగా ఇంకో సినిమా మొదలుపెట్టడానికి చాలా సమయమే తీసుకున్నాడు. ఇంతలో మల్టీస్టారర్ మూవీ శమంతకమణి లో అవకాశం రావడంతో ఆ సినిమాలో నటించాడు. తాజాగా ఆది సోలో హీరోగా ఓ కొత్త సినిమా మొదలైంది.
విశ్వనాథ్ అరిగెల అనే కొత్త దర్శకుడితో ఆది ఓ సినిమా మొదలుపెట్టాడు. ఉప్పలపాటి చరణ్ తేజ్.. గుర్రం విజయలక్ష్మి ఈ చిత్రాన్ని నిర్మిస్తున్నారు. మణిరత్నం సినిమా ‘చెలియా’లో కార్తికి గర్ల్ ఫ్రెండ్ గా నటించిన శ్రద్ధ శ్రీనాథ్ ఈ సినిమాతో కథానాయికగా టాలీవుడ్ కు పరిచయం కాబోతోంది. విశ్వనాథ్ రెండేళ్ల కిందటే ఆదికి ఈ కథ చెప్పాడట. ఈ మధ్యే బౌండెడ్ స్క్రిప్టుతో రావడంతో ఈ సినిమా చేశానని అంటున్నాడు ఆది. కళాతపస్వి విశ్వనాథ్ దర్శకత్వంలో వచ్చిన ‘స్వర్ణకమలం’ తరహాలో తన సినిమా ఉంటుందని అంటున్నాడు డెబ్యూ డైరెక్టర్. మరి చాన్నాళ్ల తర్వాత ఆది సోలో హీరోగా నటిస్తున్న ఈ సినిమా అయినా అతడికి సక్సెస్ ఇస్తుందేమో చూడాలి.
Related News
