హాస్యరసం పరిపూర్ణంగా సంతరించుకున్న రూపమే బ్రహ్మానందం. ప్రేక్షకులను నవ్వించడానికి ఆయన పెద్దగా ప్రయోగాలు చేయడు. ఒక చిన్న ఎక్స్ ప్రెషన్ .. ఒక చిన్న మూమెంట్ చాలు .. అంతే జనం కడుపుబ్బ నవ్వుకుంటారు. ఆయన పాత్ర కోసమని మళ్లీ మళ్లీ ఆ సినిమాను చూస్తారు. అలాంటి బ్రహ్మానందం .. 'జ్యోతిలక్ష్మి' సినిమాలో ఒక విభిన్నమైన పాత్రను పోషిస్తున్నాడు. ఆయన కోసం ప్రత్యేకంగా పూరీ ఈ పాత్రను క్రియేట్ చేశాడని అంటున్నారు. గతంలో 'పోకిరి' సినిమాలోని బ్రహ్మానందం పాత్రకి దక్కిన గుర్తింపు అంతా ఇంతా కాదు. ఆ స్థాయిలో ఆడియన్స్ ని అలరించేదిగా ఈ పాత్ర ఉంటుందని అంటున్నారు.
ఈ సినిమాకి సంబంధించిన తాజా షెడ్యూల్ షూటింగులో ఈ రోజు నుంచి బ్రహ్మానందం జాయిన్ అవుతున్నట్టు తెలుస్తోంది. ఆయన కాంబినేషన్లోని ఆసక్తికరమైన సన్నివేశాలను చిత్రీకరించనున్నారు. తెలుగు తెర ముద్దమందారంగా చెప్పుకునే ఛార్మీ, ఈ సినిమాలో టైటిల్ రోల్ పోషిస్తోంది. ఇది పూరీ సినిమా కావడంతో .. ఆయనకి గల ఇమేజ్ కారణంగా అంచనాలు వున్నాయి. బ్రహ్మానందం ఎంట్రీ కారణంగా ఆడియన్స్ ఆసక్తి మరింతగా పెరిగే అవకాశం ఉందని చెప్పొచ్చు.